Այսօր Քյարամ Սլոյանի ծննդյան օրն է. Վրեժ ունեմ լուծելու. Քյարամ Սլոյանի հայր
Քառօրյա պատերազմի հետեւանքով Մարտակերտում զոհված զինծառայող, ազգությամբ եզդի Քյարամ Սլոյանի հայրը՝ Քյալաշ Սլոյանը 2016 թվականի ապրիլի 30-ին մեկնեց մարտական դիրքեր: Այս մասին Xnews.am-ի հետ զրույցում նշեց ինքը՝ Քյալաշ Սլոյանը: Վերջինս՝ որդուն վերահուղարկավորելուց հետո էր որոշել մեկնել առաջնագիծ, սակայն նրան արգելել էին: Հիմա վճռական է տրամադրված, մեկնելու է, որպեսզի սեփական աչքերով տեսնի այն վայրը, որտեղ որդին է զոհվել: «Պետք է գնամ, որ այնտեղ նաեւ զոհվածի կոյկա պետք է տեղադրենք այնտեղ»,- նշեց Քյալաշ Սլոյանը, հավելելով, որ նախկինում էլ էր ցանկություն հայտնել որպես կամավոր մեկնել առաջնագիծ, բայց զինկոմիսարիատից թույլ չեն տվել:
Հիմա զոհված 20 –ամյա Քյարամ Սլոյանի հայրն առավել քան պատրաստ է մեկնելու առաջնագիծ: Հայտարարում է վրեժ ունի լուծելու:
Մեզ հետ զրույցում Քյալաշ Սլոյանը պատմեց, որ որդու հերոսական արարքների մասին բազմաթիվ անգամներ է լսել, տեղյակ է նաեւ, որ ապրիլյան պատերազմի ժամանակ կարող էր փրկվել, բայց մինչեւ վերջ որոշել է կանգնել հրամանատարի կողքին: Իսկ Քյարամի հրամանատարը կապիտան Արմենակ Ուրֆանյանն է եղել: Երկուսն էլ զոհվել են: «Ինքն իրա աֆիցերի, իրա ընկերոջ հետ՝ 3-4 հոգի են էլե, չեն թողել, որ առաջ գան, մինչև իրանց պատրոնները պրծել ա, նոր իրանց խփել են: Հրամանատարը վիրավոր ա եղել, իրան ասել ա՝ փախի, ասել ա՝ չէ, ես քեզի չեմ թողի մենակ, ու իրան էլ են խփել, որ պատրոնները պրծել են», - պատմեց հայրը:
Քյարամ Սլոյանը բազմաթիվ երազանքներ ուներ: Ամենակարեւորը կիսախարխուլ բնակարանն էր ցանկանում վերականգնել: Այդ գործը նրան ավարտին հասցնել չհաջողվեց: Հայրը փոխանցեց, որ տան տանիքի վերանորագման աշխատանքներն ավարտվել են, ներկայումս ընթանում է ներքին հարդարման աշխատանքներ:
Նշենք, որ Սլոյանների ընտանիքին օգնելու պատրաստակամություն շատերն էին հայտնել: Տանիքի վերանորոգման աշխատանքները կատարելու պատրաստակամություն էր հատնել ՀՀ Արդարադատության նախարարությունը:
